महाराष्ट्र नवनिर्माण सेनेचा इशारा
सावंतवाडी,दि.२२ ऑक्टोबर
एल निनोच्या प्रभावामुळे सिंधुदुर्ग जिल्ह्यात, विशेषतः सावंतवाडी आणि दोडामार्ग तालुक्यात सरासरीपेक्षा खूप कमी पाऊस झाला आहे. त्यामुळे सध्याच पाणीटंचाईची भीषण समस्या निर्माण झाली आहे. अशा परिस्थितीत तिलारी कालवा नूतनीकरण व देखभाल-दुरुस्तीच्या कामांसाठी कालव्यातील पाणी बंद करण्याचा निर्णय पाटबंधारे विभागाने तातडीने मागे घ्यावा, अन्यथा मनसेतर्फे हे काम तीव्र विरोध करून बंद पाडले जाईल, असा इशारा महाराष्ट्र नवनिर्माण सेनेने दिला आहे.
यासंदर्भात मनसेचे जिल्हाध्यक्ष ॲड. अनिल केसरकर यांच्या नेतृत्वाखालील शिष्टमंडळाने सिंधुदुर्ग पाटबंधारे प्रकल्प (बांधकाम विभाग, चराठे) यांच्या कार्यकारी अभियंत्यांना निवेदन सादर केले आहे.
चालू वर्षी राज्यात व जिल्ह्यात पर्जन्यमान अत्यंत कमी झाले आहे. शेती, बागायतीसोबतच आतापासूनच पिण्याच्या पाण्याची टंचाई जाणवू लागली आहे.
तिलारी धरणाचे कालवे ज्या गावांमधून जातात, तेथे पाणी जमिनीत मुरल्यामुळे गावातील विहिरींची पाण्याची पातळी वाढते. कालव्यात पाणी सोडल्याने जनतेला टंचाई भासत नाही.
ऑक्टोबर २०२६ ते मे २०२७ या कालावधीत कालवा नूतनीकरणासाठी पाणी बंद ठेवण्याची नोटीस प्रसिद्ध झाली आहे. परंतु, टंचाईच्या काळात बांदा शाखा कालव्यातील पाणी बंद केल्यास विलवडे, वाफोली, बांदा, इन्सुली व परिसरातील गावांमध्ये विहिरींची पाणीपातळी खालावून तीव्र टंचाई निर्माण होईल, अशी शक्यता या निवेदनाद्वारे व्यक्त केली आहे.
दुष्काळसदृश परिस्थितीत नवीन बांधकामांवर खर्च न करता पाणी टंचाई दूर करण्यावर भर देण्याचे शासनाचे धोरण आहे. अशा वेळी कालव्याची कामे काढून पाणी बंद करणे अयोग्य आहे.
त्यामुळे प्रशासनाने स्थानिक जनतेचा विरोध डावलून व पाणीटंचाईकडे दुर्लक्ष करून कालव्याची कामे सुरू करण्याचा प्रयत्न केल्यास महाराष्ट्र नवनिर्माण सेना काम बंद पाडेल, असा इशारा देण्यात आला आहे.
या निवेदनावर मनसे जिल्हाध्यक्ष ॲड. अनिल केसरकर, सावंतवाडी तालुका अध्यक्ष मिलिंद सावंत आणि शहर अध्यक्ष अँड राजू कासकर यांनी दिले आहे.
