पोलीस कोठडीची मुदत संपल्यानंतर अबूसाद इब्राहिम शहा याला जिल्हा व सत्र न्यायालयासमोर हजर; पुढील १५ दिवस न्यायालयीन कोठडीचा आदेश
बांदा,दि.२१ जुलै
१४ वर्षीय अल्पवयीन मुलीवर अत्याचार केल्याप्रकरणी अटक करण्यात आलेल्या संशयित आरोपी अबूसाद इब्राहिम शहा (वय ३०, रा. मुस्लिमवाडी, बांदा) याला यापूर्वी न्यायालयाने २१ जुलैपर्यंत पोलीस कोठडी सुनावली होती. या कोठडीची मुदत संपल्यानंतर मंगळवारी त्याला पुन्हा न्यायालयात हजर करण्यात आले. त्यावेळी जिल्हा व सत्र न्यायालयाने त्याची १५ दिवस न्यायालयीन कोठडीत रवानगी करण्याचा आदेश दिला.
या प्रकरणात अल्पवयीन मुलीची फूस लावून तिच्यावर अत्याचार केल्याची तक्रार दाखल झाली होती. घटनेची माहिती समोर आल्यानंतर बांदा पोलिसांनी तत्काळ गुन्हा नोंदवत संशयित आरोपीला ताब्यात घेतले होते. पुढील तपासासाठी त्याला प्रथम २१ जुलैपर्यंत पोलीस कोठडी सुनावण्यात आली होती.
पोलीस कोठडीदरम्यान तपास पथकाने संबंधित पुरावे, साक्षीदारांचे जबाब तसेच इतर आवश्यक तपास प्रक्रिया पूर्ण केली. त्यानंतर कोठडीची मुदत संपल्याने आरोपीला पुन्हा न्यायालयासमोर हजर करण्यात आले. सुनावणीनंतर जिल्हा व सत्र न्यायालयाने आरोपीची १५ दिवस न्यायालयीन कोठडीत रवानगी केली.
या गंभीर प्रकरणाचा पुढील तपास बांदा पोलीस करत असून, तपासाअंती दोषारोपपत्र दाखल करण्याची प्रक्रिया सुरू आहे.
