सावंतवाडी,दि.०१ ऑगस्ट
२ ऑगस्ट रोजी आंबोली येथे भव्य ‘आंबोली मान्सून मॅरेथॉन’ स्पर्धेचे आयोजन करण्यात आले आहे. ‘सह्याद्री ॲडव्हेंचर ॲड्रेस क्यू ग्रुप’ (आंबोली-सांगली) आणि ‘सायकलिस्ट असोसिएशन सिंधुदुर्ग’ यांच्या संयुक्त विद्यमाने ही स्पर्धा पार पडणार आहे. अध्यक्ष बाबल आल्मेडा आहेत.
या मॅरेथॉन स्पर्धेत २१ किलोमीटर, १० किलोमीटर आणि ५ किलोमीटर अशा तीन गटांमध्ये धावपटू भाग घेणार आहेत. स्पर्धेतील प्रथम व द्वितीय क्रमांक पटकावणाऱ्या विजेत्यांना रोख रक्कमेची बक्षिसे देऊन गौरविले जाणार आहे.
विविध संस्था व मान्यवरांचे सहकार्य
या स्पर्धेच्या यशस्वी आयोजनासाठी के. एस. आर. ग्रुप केसरी, आमदार दीपक केसरकर मित्र मंडळ, विशाल सेवा फाउंडेशन, संजू परब मित्र मंडळ, सिंधुदुर्ग जिल्हा बँक, राणे हॉस्पिटल (कुडाळ), सावंतवाडी पॅलेस, तसेच आंबोली व चौकुळ परिसरातील हॉटेल व्यावसायिक आणि सामाजिक क्षेत्रातील मान्यवरांचे मोलाचे सहकार्य लाभले आहे. याशिवाय सावंतवाडी व कुडाळमधील पत्रकार बंधू आणि सोशल मीडियानेही विशेष सहकार्य केले आहे.
स्पर्धेला एका विशिष्ट उंचीवर नेण्याचा प्रयत्न
ही मान्सून मॅरेथॉन एका विशिष्ट उंचीवर नेण्यासाठी आणि स्थानिक पर्यटनाला चालना देण्यासाठी आयोजक पूर्ण क्षमतेने प्रयत्नशील आहेत.
”या भव्य उपक्रमाला प्रोत्साहन देण्यासाठी जिल्ह्यातील सर्व पर्यावरणप्रेमी, क्रीडाप्रेमी आणि नागरिकांनी आंबोलीत उपस्थित राहून स्पर्धकांना शुभेच्छा द्याव्यात,” असे आवाहन शिवसेना आंबोली पंचायत समिती सदस्य मायकल डिसोझा यांनी केले आहे.
