सावंतवाडी,दि.०८ जून
राज्यातील शेतकरी आणि जनतेसाठी एक मोठी आणि दिलासादायक बातमी आहे. नैऋत्य मोसमी वारे अर्थात मान्सूनने महाराष्ट्रात अधिकृतपणे प्रवेश केला असून, त्याची मजल आता रत्नागिरी जिल्ह्यातील दापोली तालुक्यातील ‘हर्णे’ बंधरापर्यंत पोहोचली आहे. भारतीय हवामान विभागाने आज, ८ जून रोजी दुपारी यासंदर्भातील अधिकृत घोषणा केली.
हवामान विभागाने दिलेल्या माहितीनुसार, आज ८ जून रोजी मान्सूनची उत्तर सीमा महाराष्ट्रातील हर्णे (दापोली, रत्नागिरी) आणि सोलापूर या भागातून जात आहे. देशाचा विचार केला तर ही सीमा हर्णे, सोलापूर, कलबुर्गी, नंदीयाल, चेन्नई, कैलासहर, लमडिंग आणि उत्तर लखीमपूर या भागांमधून जात आहे. मान्सूनने पश्चिम-मध्य आणि पूर्व-मध्य अरबी समुद्र, कर्नाटक, आंध्र प्रदेश आणि तेलंगणाचा आणखी काही भाग व्यापत पुढे कूच केली आहे, असे हवामान विभागाने म्हटले आहे.
हवामान खात्याच्या अंदाजानुसार, पुढील २ ते ३ दिवसांत मान्सूनच्या पुढील वाटचालीसाठी अत्यंत अनुकूल परिस्थिती निर्माण झाली आहे. या काळात मान्सून मध्य अरबी समुद्र, महाराष्ट्र, कर्नाटक, तेलंगणा आणि आंध्र प्रदेशचा उर्वरित भाग व्यापेल. याशिवाय तामिळनाडू, बंगालचा उपसागर, छत्तीसगड, ओडिशा, पश्चिम बंगाल, सिक्कीम आणि ईशान्येकडील राज्यांमध्येही मान्सून वेगाने पुढे सरकण्याची दाट शक्यता आहे.
सिंधुदुर्ग जिल्ह्यात पावसाची हजेरी; वैभववाडीत सर्वाधिक नोंद
ग्रामीण कृषी मौसम सेवा (मुळदे) यांनी दिलेल्या आकडेवारीनुसार, आज ८ जून रोजी सिंधुदुर्ग जिल्ह्यात विविध ठिकाणी चांगला पाऊस झाला असून, जिल्ह्याची आजची सरासरी पावसाची नोंद १८.८१ मिमी इतकी झाली आहे.
तालुकानिहाय झालेला पाऊस (मिमी मध्ये):
वैभववाडी: ७८ मिमी (सर्वाधिक पाऊस)
देवगड: ३६ मिमी
कुडाळ: १२ मिमी
वेंगुर्ला: १० मिमी
दोडामार्ग: १० मिमी
सावंतवाडी: २.५ मिमी
मालवण: ०१ मिमी
कणकवली: ०१ मिमी
एकंदरीत, मान्सून कोकणात दाखल झाल्याने आणि वैभववाडीसह इतर तालुक्यांमध्ये पावसाने जोर धरल्याने बळीराजा सुखावला असून, शेतीच्या कामांना आता वेग येणार आहे.
