अतिवृष्टीमुळे मुख्य रस्त्यावर मोठे झाड पडले; स्थानिक युवकांनी कटरच्या सहाय्याने झाड हटवून वाहतूक सुरळीत केली.
बांदा, दि. ६ जुलै
डेगवे-भयकान येथे आज सोमवारी दुपारी अतिवृष्टीमुळे एक मोठे झाड अचानक मुख्य रस्त्यावर कोसळले. ऐन गर्दीच्या वेळी ही घटना घडल्यामुळे रस्त्याच्या दोन्ही बाजूंनी वाहनांच्या लांबच लांब रांगा लागल्या होत्या आणि काही काळासाठी वाहतूक पूर्णपणे कोंडीत सापडली होती. या घटनेची माहिती मिळताच स्थानिक ग्रामस्थांनी कसलाही विलंब न लावता तातडीने घटनास्थळाकडे धाव घेतली. गावातील तरुण आणि नागरिकांनी एकत्र येत तात्काळ कामाला सुरुवात केली. यामध्ये साहिल देसाई, नारायण देसाई, श्रावण देसाई, सिद्धांत देसाई, मधुकर देसाई आणि सलिल देसाई यांनी कटर व इतर साधनांच्या साहाय्याने कोसळलेले झाड कापून रस्त्यावरून बाजूला हटविले. ग्रामस्थांच्या या सामूहिक प्रयत्नांमुळे आणि तत्परतेमुळे अल्पावधीतच या मार्गावरील वाहतूक पुन्हा पूर्ववत सुरू झाली.
ग्रामस्थांनी दाखवलेल्या या समयसुचकतेमुळे संभाव्य मोठा अपघात टळला असून, अडकून पडलेल्या वाहनचालकांनी आणि प्रवाशांनी त्यांच्या या सामाजिक कार्याबद्दल मनापासून कौतुक केले. सध्या पावसाळ्याचे दिवस असल्याने या भागात अशा प्रकारच्या घटना वारंवार घडत आहेत. त्यामुळे प्रशासनाने परिसरातील धोकादायक झाडांची तातडीने पाहणी करावी आणि संभाव्य अपघात टाळण्यासाठी आवश्यक त्या उपाययोजना कराव्यात, अशी मागणी आता स्थानिक नागरिकांमधून केली जात आहे.
