महिला-बालकल्याण सभापती अन्वेषा आचरेकर यांच्या पुढाकाराने त्वरित धूर फवारणी
मालवण दि.२२ सप्टेंबर
मालवण शहरातील प्रभाग क्रमांक ९ मधील दांडी परिसरात डेंग्यूचे काही रुग्ण आढळून आल्याने स्थानिक नागरिकांमध्ये चिंतेचे वातावरण निर्माण झाले होते. या परिस्थितीची तातडीने दखल घेत महिला व बालकल्याण सभापती अन्वेषा आचरेकर यांनी पुढाकार घेऊन परिसरात तात्काळ धूर फवारणी आणि औषध फवारणीची कार्यवाही चालू केली आहे. या मोहिमेमुळे स्थानिक रहिवाशांना मोठा दिलासा मिळाला आहे.
दांडी परिसरात गेल्या काही दिवसांत तापाची लक्षणे असलेले आणि डेंग्यूचे निदान झालेले रुग्ण निदर्शनास आले आहेत . ही माहिती मिळताच सभापती अन्वेषा आचरेकर यांनी अजिबात वेळ न दवडता मालवण नगरपालिकेच्या आरोग्य पथकाला सोबत घेऊन प्रत्यक्ष पाहणी केली. डासांचा वाढता प्रादुर्भाव रोखण्यासाठी आणि साथीच्या आजारांचा फैलाव थांबवण्यासाठी संपूर्ण दांडी भागात, तसेच गल्लीबोळांमध्ये आणि साचलेल्या पाण्याच्या ठिकाणी कीटकनाशक औषध आणि धूर फवारणी करण्यात आली.
यावेळी बोलताना सभापती अन्वेषा आचरेकर म्हणाल्या, “नागरिकांचे आरोग्य ही आमची पहिली प्राथमिकता आहे. डेंग्यूच्या रुग्णांची नोंद होताच प्रशासनाने तातडीने उपाययोजना सुरू केल्या आहेत. मात्र, केवळ फवारणी करून चालणार नाही, तर नागरिकांनीही आपल्या परिसरात स्वच्छता राखणे अत्यंत आवश्यक आहे.” नागरिकांनी आपल्या घराच्या आजूबाजूला जुने टायर्स, नारळाच्या करवंट्या, तुटलेली भांडी, आजूबाजूला सोडलेले सांडपाणी किंवा कुंड्यांमध्ये पाणी साचू देऊ नये. आठवड्यातून एकदा ‘कोरडा दिवस’ पाळून साठवलेले पाणी काढून टाकावे आणि टाक्या झाकून ठेवाव्यात.
आरोग्य विभागातर्फे प्रभागात घरोघरी जाऊन डासोत्पत्तीची ठिकाणे शोधणे आणि नागरिकांमध्ये जनजागृती करण्याचे कामही हाती घेण्यात आले आहे. कोणत्याही नागरिकाला तीव्र ताप, अंगदुखी, डोकेदुखी किंवा अंगावर लाल पुरळ यांसारखी लक्षणे दिसून आल्यास घरगुती उपचारांवर अवलंबून न राहता तात्काळ जवळील शासकीय किंवा प्राथमिक आरोग्य केंद्रात जाऊन तपासणी करून घ्यावी, असा सल्ला आरोग्य यंत्रणेकडून देण्यात आला आहे.
अन्वेषा आचरेकर यांनी दाखवलेल्या तत्परतेमुळे आणि नगरपालिकेच्या या त्वरित कारवाईमुळे प्रभागातील नागरिकांनी समाधान व्यक्त केले असून, भविष्यातही अशा आरोग्यविषयक समस्यांवर त्वरित मार्ग काढला जाईल असा विश्वास व्यक्त करण्यात आला आहे.
