दोडामार्ग, दि. २८ जून
राष्ट्रीय पल्स पोलिओ लसीकरण मोहिमेंतर्गत रविवार दि. २८ जून २०२६ रोजी जि.प. दवाखाना घोटगेवाडी येथे सकाळी आठ वाजता लसीकरण मोहिमेचा शुभारंभ करण्यात आला.
सरपंच श्रीनिवास शेटकर, उपसरपंच सागर कर्पे व वैद्यकीय अधिकारी डॉ. निरंजन शर्मा यांच्या हस्ते 5 वर्षांखालील बालकांना पोलिओ डोस पाजून मोहिमेस सुरुवात झाली. यावेळी गावातील आशा सेविका, अंगणवाडी सेविका, मोठ्या संख्येने माता व पालक उपस्थित होते.
डॉ. शर्मा यांनी सांगितले की, “एकही बालक पोलिओ डोसपासून वंचित राहू नये यासाठी घरोघरी जाऊन लसीकरण करण्यात येणार आहे.” सरपंच श्री. शेटकर यांनी सर्व पालकांना आपल्या 0 ते 5 वयोगटातील बालकांना पोलिओ डोस देण्याचे आवाहन केले. सकाळी 8:00 ते सायं.5 वाजेपर्यंत जि.प.दवाखान्यात लसीकरण सुरू राहणार आहे.
