सावंतवाडी,दि.१२ ऑगस्ट
संस्कृत भाषेचा प्रचार व संवर्धनासाठी अटल प्रतिष्ठानच्या वतीने रविवार, ३० ऑगस्ट २०२६ रोजी सकाळी १० वाजता श्री. पंचम खेमराज महाविद्यालय, सावंतवाडी येथे जिल्हास्तरीय संस्कृत भाषा स्पर्धांचे आयोजन करण्यात आले आहे. डॉ. अमुल पावसकर व कुडाळ एम.आय.डी.सी. इंडस्ट्रिज असोसिएशनचे उपाध्यक्ष डॉ. नितीन पावसकर यांनी आपले वडील स्व. महादेव उर्फ भास्कर नारायण पावसकर यांच्या स्मरणार्थ या स्पर्धा प्रायोजित केल्या आहेत.
ही स्पर्धा तीन गटांत होणार आहे. यामध्ये इयत्ता ५ वी ते ६ वी – गणपती स्तोत्र पाठांतर, इयत्ता ७ वी ते ८ वी – गीत गायन, तर इयत्ता ९ वी ते १० वी – कथाकथन स्पर्धा घेतली जाईल. विजेत्यांना बांबूपासून बनवलेली आकर्षक स्मृतीचिन्हे व सर्व सहभागींना प्रशस्तीपत्र प्रदान करण्यात येणार आहे.
स्पर्धेत सहभागी होण्यासाठी जिल्ह्यातील शाळांनी २५ ऑगस्ट २०२६ पूर्वी कु. ज्योती राऊळ (मोबा. ९४०४७५६८९५) यांच्याकडे नोंदणी करावी, असे आवाहन अटल प्रतिष्ठानचे अध्यक्ष अॅड. नकुल पार्सेकर व कार्यवाह रघुनाथ तानावडे यांनी केले आहे.
