तालुकास्तरीय स्पर्धेत विद्यार्थ्यांची चमकदार कामगिरी; सात विद्यार्थ्यांची जिल्हास्तरीय स्पर्धेसाठी निवड, आर्या कापडी व प्राची राऊळ यांची विशेष कामगिरी
सावंतवाडी,दि.१७ ऑक्टोंबर
बांदा येथे पार पडलेल्या तालुकास्तरीय मैदानी क्रीडा स्पर्धेत नेमळे पंचक्रोशी माध्यमिक व उच्च माध्यमिक विद्यालयातील विद्यार्थ्यांनी उल्लेखनीय यश मिळवले आहे. या चमकदार कामगिरीमुळे विद्यालयातील सात विद्यार्थ्यांची जिल्हास्तरीय स्पर्धेसाठी निवड झाली आहे.
या स्पर्धेत १९ वर्षांखालील मुलींच्या गटात आर्या कापडी हिने १५०० मीटर धावणे व लांब उडीमध्ये प्रथम क्रमांक मिळवला. प्राची राऊळ हिने गोळाफेकमध्ये प्रथम, तर १०० मीटर धावण्यात द्वितीय क्रमांक पटकावला.
१९ वर्षांखालील मुलांच्या गटात ऋतुराज वराडकर याने भालाफेकमध्ये प्रथम, तर सोहम मडवळ याने गोळाफेकमध्ये द्वितीय क्रमांक मिळवला.
१४ वर्षांखालील गटात नेहा सुकळवाडकर हिने २०० मीटर धावण्यात प्रथम, सोनाक्षी दळवी हिने ८०० मीटर धावण्यात प्रथम, तर क्रिशांक मुंडये याने २०० मीटर धावण्यात तृतीय क्रमांक पटकावला.
विद्यार्थ्यांना प्राचार्य आर. के. राठोड, पांडुरंग दळवी व लवू जाधव यांचे मार्गदर्शन लाभले.
या यशाबद्दल नेमळे पंचक्रोशी शिक्षण संस्थेचे अध्यक्ष आ. भि. राऊळ सर, संस्थेचे सर्व पदाधिकारी, प्राचार्य आर. के. राठोड तसेच शिक्षक व शिक्षकेतर कर्मचाऱ्यांनी सर्व यशस्वी विद्यार्थ्यांचे अभिनंदन केले आहे.
