कॅरम आणि बुद्धिबळात दैदीप्यमान कामगिरी; मुक्ताई ॲकेडमीच्या शिरपेचात मानाचा तुरा
सावंतवाडी (४ नोव्हेंबर):
क्रीडा व युवक सेवा संचालनालय, महाराष्ट्र राज्य आणि जिल्हा क्रीडाधिकारी कार्यालय, सिंधुदुर्ग यांच्यातर्फे ओरोस येथे नुकत्याच आयोजित जिल्हास्तरीय कॅरम स्पर्धेत सावंतवाडीच्या मुक्ताई ॲकेडमीच्या साक्षी रामदूरकरने आपल्या उत्कृष्ट खेळाचे प्रदर्शन घडवले आहे. अत्यंत अचूकता, एकाग्रता आणि जिद्दीच्या जोरावर साक्षीने १७ वर्षांखालील वयोगटात विभाग स्तरावर सलग पाचव्यांदा निवड मिळवून एक नवा इतिहास रचला आहे.
अभ्यासासोबतच खेळांमध्येही अव्वल
सध्या दहावीमध्ये शिकत असलेल्या साक्षीने केवळ अभ्यासातच नव्हे, तर कॅरम आणि बुद्धिबळ या दोन्ही खेळांमध्ये आपले विशेष प्राविण्य सिद्ध केले आहे. सलग पाच वर्षे कॅरम आणि बुद्धिबळ या दोन्ही खेळांमध्ये विभाग स्तरावर निवड होणारी ती राज्यातील एकमेव खेळाडू ठरली आहे.
मुक्ताई ॲकेडमीचे अध्यक्ष आणि ज्येष्ठ कॅरम व बुद्धिबळ प्रशिक्षक श्री. कौस्तुभ पेडणेकर यांच्या मार्गदर्शनाखाली साक्षीने हे निर्विवाद यश संपादन केले आहे. पेडणेकरांच्या मार्गदर्शनाखाली साक्षीने अथक मेहनत घेत राज्यस्तरीय शालेय स्पर्धा आणि असोसिएशनच्या राज्य स्तरावरील स्पर्धेत उत्तम कामगिरी केली आहे. विशेष म्हणजे, तिने वयाच्या चौदाव्या वर्षीच राज्यस्तरीय स्पर्धेत १७ वर्षांखालील गटात राज्याचे उपविजेतेपद पटकावले होते. गेल्या दहा वर्षांत श्री. कौस्तुभ पेडणेकर यांच्या मार्गदर्शनाखाली राष्ट्रीय स्तरावर ३ मुलींची आणि राज्य स्तरावर १६ मुला-मु मुलींची निवड झाली आहे.
आपल्या या यशाचे सारे श्रेय साक्षीने श्री. कौस्तुभ पेडणेकर आणि मुक्ताई ॲकेडमीला दिले आहे. प्रशिक्षक कौस्तुभ पेडणेकर यांनी साक्षी ही एक गुणी आणि प्रतिभावान खेळाडू असून तिचे भवितव्य अत्यंत उज्ज्वल असल्याचे गौरवोद्गार काढले आहेत. साक्षीच्या या दैदीप्यमान यशाबद्दल मुक्ताई ॲकेडमीच्या सचिव सौ. स्नेहा पेडणेकर आणि कोषाध्यक्ष बाळकृष्ण पेडणेकर यांनी तिचे अभिनंदन करून पुढील उज्ज्वल भविष्यासाठी शुभेच्छा दिल्या आहेत. तिच्या या यशाबद्दल सावंतवाडीसह संपूर्ण सिंधुदुर्ग जिल्ह्यातून साक्षीवर अभिनुकानाचा वर्षाव होत आहे.
