माता जिजाऊ कुमारी फुगडी मंडळाची स्थापना; लोककलेच्या माध्यमातून सांस्कृतिक वारसा पुढील पिढीपर्यंत पोहोचविण्याचा अनोखा प्रयत्न
सावंतवाडी,दि.२१ सप्टेंबर
मोबाईलच्या आभासी दुनियेत रमणाऱ्या आजच्या पिढीतील मुलांना पारंपरिक कला आणि संस्कृतीचा विसर पडत चालला असताना, मळगाव तेलकाटावाडी येथील छोट्या मुलींनी मात्र आपल्या संस्कृतीची नाळ घट्ट धरून ठेवली आहे. फुगडी या महाराष्ट्राच्या समृद्ध लोककलेचे जतन करण्यासाठी या मुलींनी एकत्र येत माता जिजाऊ कुमारी फुगडी मंडळाची स्थापना करत पारंपरिक फुगडीच्या माध्यमातून आपल्या पूर्वजांनी जपलेला सांस्कृतिक वारसा पुढील पिढीपर्यंत पोहोचविण्याचा या चिमुकल्यांचा प्रयत्न कौतुकास्पद ठरत आहे.
आजच्या डिजिटल युगात लहान मुले मोबाईल, दूरचित्रवाणी आणि विविध मनोरंजनाच्या साधनांमध्ये अधिक रमलेली दिसतात. अशा परिस्थितीत मळगाव तेलकाटावाडी येथील मुलींनी मोबाईलच्या आभासी जगापेक्षा आपल्या मातीत रुजलेल्या पारंपरिक कलांना प्राधान्य दिले आहे. फुगडीच्या माध्यमातून मनोरंजनासोबतच आपल्या संस्कृतीचे जतन करण्याचा संदेश त्यांनी दिला आहे.
तेलकाटावाडी येथील या चिमुकल्या मुलींनी एकत्र येत ‘माता जिजाऊ कुमारी फुगडी मंडळाची स्थापना केली. यंदा या मंडळाचे दुसरे वर्ष असून, मंडळाच्या माध्यमातून विविध पारंपरिक फुगड्यांचे सादरीकरण केले जात आहे. फुगडीच्या तालावर फेर धरताना या मुली केवळ कला सादर करत नाहीत, तर आपल्या लोकपरंपरेचा समृद्ध वारसाही जपत आहेत.
फुगडी ही महाराष्ट्राच्या लोकजीवनाशी घट्ट जोडलेली पारंपरिक कला आहे. सण-उत्सव, विशेषतः गणेशोत्सव आणि नवरात्रोत्सवाच्या काळात फुगडीला विशेष महत्त्व असते. या कलेच्या माध्यमातून महिलांमध्ये आणि मुलींमध्ये एकोपा, आनंद आणि सांस्कृतिक जिव्हाळा निर्माण होतो. तेलकाटावाडी येथील या चिमुकल्या मुली फुगडीच्या माध्यमातून हीच परंपरा पुढे नेण्याचे कार्य करीत आहेत.
माता जिजाऊ कुमारी फुगडी मंडळाच्या हर्षिता राऊळ, खुशी लातये, हास्या लातये, समीक्षा राऊळ, संस्कृती राऊळ, श्रावणी गावडे या चिमुकल्यांनी लहान वयातच घेतलेला हा पुढाकार इतर मुलांसाठीही प्रेरणादायी ठरत आहे. नव्या पिढीने आपल्या संस्कृतीशी नाते जोडावे आणि पारंपरिक लोककलांचे जतन करावे, यासाठी अशा गोष्टींना प्रोत्साहन मिळणे गरजेचे आहे.
पारंपरिक कलेचा वारसा जपत नव्या पिढीला संस्कृतीची ओळख करून देणाऱ्या या चिमुकल्या फुगडीपटूंचे सर्व स्तरांतून कौतुक होत आहे.
या चिमुकल्यांनी गणपती च्या तीन महिने अगोदर रोज फुगडीचा सराव करत शिस्तबद्ध फुगड्या सादर करत ही परंपरा अतिशय चांगल्या प्रकारे जोपासली आहे. त्यांचा हा प्रयत्न कौतुकास्पद ठरत आहे. फुगडीसाठी हर्षिता राऊळ व खुशी लातये यांच्याशी संपर्क साधावा, असे आवाहन माता जिजाऊ कुमारी फुगडी मंडळाच्यावतीने करण्यात आले आहे.
