तळेरेत अनंत चतुर्दशीला भावपूर्ण निरोप; ‘पुढच्या वर्षी लवकर या, आनंदाने या… उत्साह घेऊन या!’
तळेरे, दि. २५ सप्टेंबर*,
गणेशोत्सवाच्या मंगलमय दिवसांची सांगता अनंत चतुर्दशीला तळेरे-कासार्डेसह दारूम, गवाणे, साळिस्ते परिसरात भावपूर्ण वातावरणात झाली. ढोल-ताशांचा गजर, टाळ-मृदंगाचा निनाद आणि ‘गणपती बाप्पा मोरया’च्या जयघोषात गणरायाला निरोप देण्यात आला. बाप्पाला निरोप देताना भक्तांच्या डोळ्यांत अश्रू होते; मात्र मनात पुढील वर्षीच्या आगमनाची आस होती.
यंदा पावसाचे प्रमाण कमी राहिल्याने परिसरात नाराजीचे वातावरण आहे. नद्या, ओहोळ आणि जलस्रोतांमध्ये अपेक्षित पाणी नसल्याने शेतीसह सर्वसामान्यांच्या जीवनावर त्याचा परिणाम जाणवत आहे. त्यामुळे विसर्जनावेळी गणेशभक्तांनी चांगला आणि भरपूर पाऊस पडू दे, निसर्ग पुन्हा हिरवागार होऊ दे, अशी मनोभावे प्रार्थना बाप्पाच्या चरणी केली.
तळेरे, कासार्डे, दारूम, गवाणे आणि साळिस्ते परिसरातील विविध ठिकाणांहून गणरायाच्या मिरवणुका उत्साहात काढण्यात आल्या. पारंपरिक वाद्यांचा निनाद, भक्तिगीते आणि ‘बाप्पा मोरया’च्या जयघोषाने परिसर दुमदुमून गेला. विसर्जनापूर्वी आरती करून गणरायाला निरोप देताना अनेक भक्त भावुक झाले.
‘गणपती बाप्पा मोरया… पुढच्या वर्षी लवकर या, आनंदाने या, उत्साह घेऊन या आणि भरभरून पाऊस घेऊन या!’ या भावनिक जयघोषात गणरायांचे विसर्जन करण्यात आले.
बाप्पाची मूर्ती जलात विसर्जित झाली, मात्र भक्तांच्या मनातील श्रद्धा आणि पुढील वर्षीच्या आगमनाची ओढ कायम राहिली. यंदाच्या पावसाच्या कमतरतेची खंत मनात ठेवत, पुढील वर्षी सुख-समृद्धीसोबत भरपूर पाऊस घेऊन येण्याचे साकडे गणरायाला घालत भक्तांनी भावपूर्ण निरोप दिला.
