पंचायत समिती सदस्य मंगेश लोके यांच्या उपस्थितीत उद्घाटन; दूध उत्पादक शेतकऱ्यांना स्थानिक पातळीवर सुविधा
वैभववाडी,दि.०४ सप्टेंबर
खांबाळे (चव्हाटेवाडी) येथे ‘श्री आई आदिष्टी देवी डेअरी’च्या दूध संकलन केंद्राचा शुभारंभ मंगळवारी, १ सप्टेंबर रोजी पंचायत समिती सदस्य मंगेश लोके यांच्या प्रमुख उपस्थितीत उत्साहात करण्यात आला. या केंद्रामुळे परिसरातील दूध उत्पादक शेतकऱ्यांना दररोजचे दूध स्थानिक पातळीवर संकलनासाठी देण्याची सुविधा उपलब्ध झाली आहे.
हे दूध संकलन केंद्र श्री स्वामी समर्थ मिल्क अँड मिल्क प्रॉडक्ट्स, कसबा वाळवे (घोणसरी–फोंडाघाट) यांच्याशी संलग्न असून, या केंद्रावर परिसरातील शेतकऱ्यांकडून नियमितपणे दूध संकलन केले जाणार आहे. त्यामुळे दूध उत्पादकांना दूध विक्रीसाठी दूरवर जाण्याची गरज भासणार नसून, स्थानिक पातळीवरच संकलनाची सुविधा मिळणार आहे.
ग्रामीण भागातील अनेक कुटुंबांच्या उत्पन्नाचा दूध व्यवसाय हा महत्त्वाचा आधार आहे. दूध संकलनाची नियमित आणि सोयीस्कर व्यवस्था उपलब्ध झाल्यामुळे शेतकऱ्यांच्या दैनंदिन व्यवहारांना मोठी मदत होणार असून, दूध व्यवसायाला चालना मिळण्यासही हातभार लागणार आहे.
यावेळी पंचायत समिती सदस्य मंगेश लोके यांनी दूध उत्पादक शेतकऱ्यांशी संवाद साधून दूध संकलन केंद्राच्या कामकाजाची माहिती घेतली. स्थानिक दूध उत्पादकांना नियमित व सुलभ संकलनाची सुविधा उपलब्ध होणे आवश्यक असल्याचे त्यांनी सांगितले.
यावेळी डेअरीचे चालक विक्रांत रणजीत पवार, व्यवस्थापक सचिन पाटील, अक्षय परब, निवृत्त तहसीलदार गुरुनाथ हून्नरे, पोलीस पाटील रुपेश कांबळे, माजी सरपंच गणेश पवार, तंटामुक्त समिती अध्यक्ष ओमकार पवार, गुरुनाथ गुरव, नारायण पवार, रामचंद्र गुरव, जयेश पवार, गितेश कडू, वैभव पवार, सुनील गुरव, गणेश गंगाराम पवार, नाना शेळके, महेश चव्हाण, संदीप पवार, उमेश पवार, सत्यवान पवार, दिनेश पालकर, शिवाजी पवार, परशुराम गुरव, प्रशांत गुरव, मंगेश सूद, सचिन पवार, भरत साळुंखे, मुकेश पवार, समीर पवार, प्रविण साळुंखे, सखाराम पवार, प्रदीप पवार, दीपक हून्नरे, कमलेश पवार, सर्वेश पवार आदींसह दूध उत्पादक शेतकरी व ग्रामस्थ मोठ्या संख्येने उपस्थित होते.
यावेळी व्यवस्थापक सचिन पाटील यांनी उपस्थितांना दूध संकलन केंद्राच्या कामकाजाबाबत मार्गदर्शन केले.
