राज्यस्तरीय संघटनेत सर्वात तरुण अस्थिरोगतज्ज्ञाला महत्त्वाची जबाबदारी; देवगडच्या वैद्यकीय क्षेत्रासाठी अभिमानाचा क्षण
देवगड ,दि.२३ जुलै
देवगडच्या वैद्यकीय क्षेत्रासाठी अभिमानाची बातमी ठरावी अशी उल्लेखनीय कामगिरी अस्थिरोगतज्ज्ञ डॉ. तन्मय सुनील आठवले यांनी केली आहे. महाराष्ट्रातील अस्थिरोगतज्ज्ञांची अग्रगण्य आणि प्रतिष्ठित संघटना असलेल्या महाराष्ट्र ऑर्थोपेडिक असोसिएशन (MOA) च्या सहायक वेबमास्टर तसेच कार्यकारी समिती सदस्य या महत्त्वाच्या पदांवर त्यांची निवड झाली आहे. अत्यंत कमी वयात राज्यस्तरीय संघटनेत ही जबाबदारी मिळवणारे ते महाराष्ट्रातील सर्वात तरुण अस्थिरोगतज्ज्ञ ठरले असून, त्यांच्या या यशामुळे देवगडसह संपूर्ण सिंधुदुर्ग जिल्ह्याच्या वैद्यकीय क्षेत्राच्या शिरपेचात मानाचा तुरा रोवला गेला आहे.
महाराष्ट्र ऑर्थोपेडिक असोसिएशन ही राज्यातील अस्थिरोगतज्ज्ञांची प्रमुख व्यावसायिक संघटना असून आधुनिक वैद्यकीय ज्ञान, संशोधन, प्रशिक्षण, परिषदांचे आयोजन आणि अद्ययावत उपचारपद्धतींचा प्रसार करण्यासाठी कार्यरत आहे. अशा प्रतिष्ठित संघटनेच्या कार्यकारी समितीत स्थान मिळणे ही डॉ. आठवले यांच्या वैद्यकीय ज्ञान, संघटन कौशल्य आणि तांत्रिक प्रावीण्याची मोठी दखल मानली जात आहे.
सहायक वेबमास्टर म्हणून डॉ. आठवले यांच्याकडे संघटनेच्या डिजिटल शैक्षणिक उपक्रमांची जबाबदारी सोपविण्यात आली आहे. राज्यभरातील अस्थिरोगतज्ज्ञांसाठी आयोजित करण्यात येणाऱ्या वेबिनारचे नियोजन, एमओएच्या अधिकृत संकेतस्थळ व मोबाईल अॅपचे व्यवस्थापन, डिजिटल शैक्षणिक साहित्याचे प्रसारण, तसेच ऑनलाइन व्यासपीठावरून थेट शस्त्रक्रियांचे प्रक्षेपण आणि समन्वय अशी महत्त्वपूर्ण कामे ते पाहणार आहेत.
सध्याच्या डिजिटल युगात वैद्यकीय शिक्षण अधिक प्रभावी करण्यासाठी ऑनलाइन माध्यमांची भूमिका अत्यंत महत्त्वाची ठरत आहे. नवीन संशोधन, आधुनिक उपचारपद्धती, तज्ज्ञांचे मार्गदर्शन आणि प्रत्यक्ष शस्त्रक्रियांचे प्रशिक्षण राज्यभरातील डॉक्टरांपर्यंत पोहोचविण्यात एमओएचे डिजिटल व्यासपीठ महत्त्वाची भूमिका बजावत आहे. या पार्श्वभूमीवर ग्रामीण भागातून कार्यरत असलेल्या, तंत्रज्ञानाचा प्रभावी वापर करणाऱ्या आणि शैक्षणिक उपक्रमांमध्ये सक्रिय सहभाग असलेल्या डॉ. तन्मय आठवले यांची निवड विशेष महत्त्वाची मानली जात आहे.
नुकत्याच झालेल्या एमओएच्या कार्यकारी परिषदेच्या बैठकीसाठीही डॉ. आठवले यांना निमंत्रित करण्यात आले होते. या बैठकीत राज्यातील अस्थिरोग शिक्षण अधिक सक्षम करणे, डिजिटल माध्यमांचा प्रभावी वापर वाढविणे, तरुण डॉक्टरांना व्यासपीठ उपलब्ध करून देणे आणि राज्यभरातील अस्थिरोगतज्ज्ञांमध्ये ज्ञानाची देवाणघेवाण वाढविणे यांसारख्या महत्त्वाच्या विषयांवर चर्चा करण्यात आली.
डॉ. तन्मय आठवले हे अनेक राष्ट्रीय आणि आंतरराष्ट्रीय अस्थिरोग संघटनांचे सदस्य आहेत. आधुनिक उपचारपद्धती, संशोधन आणि वैद्यकीय क्षेत्रातील नव्या तंत्रज्ञानाचा सातत्याने अभ्यास करून ग्रामीण भागातील रुग्णांनाही महानगरांप्रमाणे दर्जेदार उपचार मिळावेत, यासाठी ते प्रयत्नशील आहेत. ते पुण्यातील नामांकित संचेती इन्स्टिट्यूट ऑफ ऑर्थोपेडिक्स अँड ट्रॉमा येथे पॅनेल डॉक्टर म्हणूनही कार्यरत आहेत.
याशिवाय ते OrthoTV या व्यासपीठाशी सक्रियपणे संलग्न असून विविध राष्ट्रीय आणि आंतरराष्ट्रीय परिषदांमध्ये भारतातील तसेच परदेशातील ख्यातनाम अस्थिरोगतज्ज्ञांच्या मुलाखती आणि पॉडकास्टचे यशस्वी सूत्रसंचालन त्यांनी केले आहे. या माध्यमातून अत्याधुनिक वैद्यकीय ज्ञान अधिकाधिक डॉक्टरांपर्यंत पोहोचविण्याचे कार्य ते सातत्याने करत आहेत.
सध्या डॉ. आठवले हे देवगड मेडिकल फाउंडेशन येथे पूर्णवेळ अस्थिरोगतज्ज्ञ म्हणून रुग्णसेवा देत आहेत. याशिवाय महिन्यातून दोन वेळा ते शासकीय ग्रामीण रुग्णालय, देवगड तसेच डॉ. शिवेश्वरकर हॉस्पिटल, आचरा येथेही सेवा देतात. त्यामुळे देवगड व आचरा परिसरातील रुग्णांना नियमित तज्ज्ञ अस्थिरोग उपचार उपलब्ध होत आहेत.
मोठ्या शहरांतील संधींचा मोह टाळून आपल्या मातृभूमीत राहून ग्रामीण रुग्णसेवेला प्राधान्य देतानाच राज्य, राष्ट्रीय आणि आंतरराष्ट्रीय स्तरावर स्वतंत्र ओळख निर्माण करणारे डॉ. तन्मय आठवले हे आजच्या तरुण वैद्यकीय पिढीसाठी प्रेरणास्थान ठरत आहेत. वैद्यकीय सेवा, डिजिटल शिक्षण, संशोधन, पॉडकास्ट आणि संघटनात्मक कार्य यांचा उत्कृष्ट समन्वय साधत त्यांनी ग्रामीण भागातील डॉक्टरही राज्यस्तरीय नेतृत्व करू शकतात, हे आपल्या कार्यातून सिद्ध केले आहे.
डॉ. तन्मय आठवले यांच्या या उल्लेखनीय यशाबद्दल देवगड, सिंधुदुर्ग जिल्हा तसेच राज्यभरातील वैद्यकीय, सामाजिक आणि विविध क्षेत्रांतील मान्यवरांकडून त्यांचे अभिनंदन होत आहे. त्यांच्या या निवडीमुळे देवगड मेडिकल फाउंडेशनच्या सात दशकांच्या वैद्यकीय परंपरेला नवा आयाम लाभला असून, देवगडचे नाव महाराष्ट्राच्या वैद्यकीय आणि शैक्षणिक क्षेत्रात अधिक ठळकपणे अधोरेखित झाले आहे.
