सावंतवाडी, दि. २ जुलै
निसर्गाचा अद्भूत चमत्कार आणि महाराष्ट्राचे चेरापुंजी म्हणून ओळखल्या जाणाऱ्या आंबोली घाट परिसरात अखेर पावसाने दमदार हजेरी लावली आहे. येथील मुख्य धबधब्यासह परिसरातील छोटे-मोठे धबधबे आता पूर्ण वेगाने प्रवाहित झाले असून, यामुळे आंबोली, गेळे आणि चौकुळ परिसरातील बहुप्रतिक्षित पावसाळी पर्यटनाचा हंगाम अधिकृतपणे सुरू झाला आहे. येत्या शनिवार आणि रविवारी वीकेंड साधून आंबोलीमध्ये पर्यटकांची मोठी वर्दळ पाहायला मिळणार आहे.
यंदाच्या हंगामात बदलत्या हवामानामुळे मान्सूनचे आगमन काहीसे लांबले. पाऊस उशिराने सुरू झाल्यामुळे नेहमी जूनच्या सुरुवातीला गजबजणाऱ्या आंबोली घाटात यंदा पर्यटनाची पावले उशिराने पडली. मात्र, आता पावसाने जोर धरल्याने संपूर्ण घाट माथा हिरवाईने नटला आहे. आंबोलीमध्ये तसे वर्षभर पर्यटकांची ये-जा सुरू असते, परंतु पावसाळ्यात येथील रूप काही वेगळेच असते. या दिवसांत पर्यटकांची गर्दी अक्षरशः ओसंडून वाहते.
धुके, पाऊस अन् धबधब्यांची जुगलबंदी!
आंबोली, चौकुळ आणि गेळे या तिन्ही गावांना निसर्गाने भरभरून सौंदर्य दिले आहे. येथील मुख्य आकर्षण म्हणजे अंगाला झोंबणारी थंड हवा, डोळ्यांसमोरून सरकणारे दाट धुके आणि डोंगरावरून कोसळणारे पांढरे शुभ्र धबधबे. हे विहंगम दृश्य अनुभवण्यासाठी दरवर्षी महाराष्ट्र, गोवा आणि कर्नाटक या तिन्ही राज्यांतून लाखो पर्यटक येथे दाखल होतात.
सध्या घाटात धुक्याचे साम्राज्य पसरले असून, धबधब्यांखाली भिजण्याचा आनंद घेण्यासाठी पर्यटकांनी आतापासूनच गर्दी करायला सुरुवात केली आहे. हॉटेल व्यावसायिक, स्थानिक गाइड आणि छोटे विक्रेतेही पर्यटकांच्या स्वागतासाठी सज्ज झाले आहेत. उशिरा का होईना, पण निसर्गाच्या या बदललेल्या रूपामुळे यंदाचाही पर्यटन हंगाम जोरदार गाजणार, अशी चिन्हे दिसत आहेत.
