वेंगुर्ला,दि.२८ जून
साहित्य, संस्कृती आणि काव्य संवर्धनासाठी सातत्याने कार्यरत असलेले आनंदयात्री वाङ्मय मंडळ विविध साहित्यिक उपक्रमांच्या माध्यमातून कवी, लेखक आणि रसिक यांना एकत्र आणण्याचे कार्य करीत आहे. नवोदित आणि प्रस्थापित साहित्यिकांना व्यासपीठ उपलब्ध करून देण्याच्या उद्देशाने मंडळातर्फे दरवर्षी विविध साहित्यिक कार्यक्रमांचे आयोजन केले जाते. याच उपक्रमांच्या मालिकेतील एक महत्त्वाचा कार्यक्रम म्हणून ‘रंग उगवतीचे’ कवी संमेलन आयोजित करण्यात आले आहे. हे संमेलन
४ जुलै रोजी सायंकाळी ४.३० वा. कॅम्प येथील बॅ. नाथ पै स्मारक सभागृहात संपन्न होणार आहे.
या कार्यक्रमाला ज्येष्ठ साहित्यिक आणि सुप्रसिद्ध कवी शशिकांत तिरोडकर यांचे अध्यक्षस्थान लाभणार आहे. मूळ फोंडा येथील असलेले आणि सध्या पुणे येथे वास्तव्यास असलेले तिरोडकर यांनी आपल्या काव्यलेखनातून संवेदनशीलता, सामाजिक भान आणि जीवनमूल्यांचा प्रभावी आविष्कार घडविला आहे. तसेच, कोकणातील प्रख्यात कवी, साहित्यप्रेमी आणि विधिज्ञ अॅड. विलास कुवळेकर यांची प्रमुख उपस्थिती लाभणार आहे. त्यांच्या साहित्यिक अनुभवामुळे कार्यक्रमाची शोभा अधिक वाढणार असून उपस्थितांना त्यांच्या विचारांचा लाभ मिळणार आहे.
‘रंग उगवतीचे’ या संकल्पनेतून नव्या विचारांचे, नव्या भावविश्वाचे आणि नव्या काव्यरंगांचे स्वागत करण्याचा प्रयत्न करण्यात आला आहे. या कवी संमेलनात आनंदयात्री वाङ्मय मंडळाशी संलग्न असलेले कवी-कवयित्री आपल्या स्वरचित कविता सादर करणार आहेत. प्रेम, निसर्ग, सामाजिक वास्तव, मानवी नातेसंबंध, ग्रामीण जीवन, समकालीन घडामोडी आणि जीवनमूल्ये अशा विविध विषयांवरील कवितांचा बहारदार आविष्कार या निमित्ताने रसिकांना अनुभवता येणार आहे.
या काव्यसंमेलनाच्या माध्यमातून साहित्यिक संवादाला चालना मिळावी, नवोदित कवींना प्रोत्साहन मिळावे आणि काव्यरसिकांना दर्जेदार साहित्याचा आस्वाद घेता यावा हा या उपक्रमामागील प्रमुख हेतू असल्याचे आयोजकांनी सांगितले.
साहित्यप्रेमी, काव्यरसिक, विद्यार्थी, शिक्षक तसेच सांस्कृतिक क्षेत्राशी निगडित सर्वांनी या कार्यक्रमास उपस्थित राहून काव्याचा आनंद घ्यावा आणि कार्यक्रम यशस्वी करावा, असे आवाहन आनंदयात्री वाङ्मय मंडळाच्या अध्यक्षा वृंदा कांबळी व सचिव डॉ. प्रा. सचिन परूळकर यांनी केले आहे.
