भातशेती पिकांच्या परिस्थितीची पाहणी; संभाव्य दुष्काळाच्या पार्श्वभूमीवर आढावा बैठक
सिंधुदुर्ग,दि.२६ सप्टेंबर
राज्याचे मत्स्यव्यवसाय व बंदरे विकास मंत्री तथा सिंधुदुर्ग जिल्ह्याचे पालकमंत्री नितेश राणे रविवार, दि. २७ सप्टेंबर २०२६ रोजी सिंधुदुर्ग जिल्ह्याच्या दौऱ्यावर येणार आहेत. या दौऱ्यात ते जिल्ह्यातील विविध भागांतील भातशेती पिकांच्या परिस्थितीची पाहणी करणार असून, संभाव्य दुष्काळी परिस्थितीच्या पार्श्वभूमीवर जिल्हास्तरीय आढावा बैठकीसही उपस्थित राहणार आहेत.
दौऱ्याच्या नियोजित कार्यक्रमानुसार सकाळी ९ वाजता मंत्री नितेश राणे हे मोपा, गोवा येथील मनोहर आंतरराष्ट्रीय विमानतळावरून मोटारीने सिंधुदुर्गकडे रवाना होतील. सकाळी १०.३० वाजता मळेवाड, ता. सावंतवाडी येथे भातशेती पिकांच्या परिस्थितीची पाहणी करतील. त्यानंतर सकाळी ११ वाजता होडावडा, ता. वेंगुर्ला येथे भातशेतीची पाहणी करण्यात येणार आहे.
दुपारी १२ वाजता सिंधुदुर्गनगरी येथील जिल्हाधिकारी कार्यालयातील सभागृहात संभाव्य दुष्काळी परिस्थितीचा आढावा घेण्यासाठी आयोजित बैठकीस ते उपस्थित राहतील.
यानंतर दुपारी ३.३० वाजता बेळणे खुर्द, ता. कणकवली येथे भातशेती पिकांच्या परिस्थितीची पाहणी केली जाणार आहे. सायंकाळी ४.३० वाजता शिरगाव, शेवरे-तांबळवाडी, ता. देवगड येथे, तर सायंकाळी ५.३० वाजता नाधवडे, ता. वैभववाडी येथे भातशेती पिकांची पाहणी मंत्री राणे करणार आहेत.
दरम्यान, मंत्री महोदयांच्या दौऱ्याच्या पार्श्वभूमीवर संबंधित प्रशासनाने आवश्यक वाहन, निवास, सुरक्षा तसेच शासकीय अधिकाऱ्यांच्या उपस्थितीची व्यवस्था करण्याच्या सूचना देण्यात आल्या आहेत. जिल्ह्यातील भातशेतीची सद्यस्थिती, पिकांवरील परिणाम आणि संभाव्य दुष्काळी परिस्थिती याबाबतच्या पाहणीमुळे शेतकऱ्यांच्या प्रश्नांकडे प्रशासनाचे लक्ष वेधले जाणार आहे.
